ರಾಜಿ(story)

                                                                        ರಾಜಿ

     ನಗರದ  ಗೌಜು ಗದ್ದಲದಿಂದ, ವಾಯು ಮಾಲಿನ್ಯ ಹಾಗೂ ಶಬ್ದ ಮಾಲಿನ್ಯದಿಂದ ಹೊರತಾದ ನಮ್ಮ ಸುಂದರ ಬಡಾವಣೆಯಲ್ಲಿ ಒಂದು ಕೆರೆ ಸಹ ಇದ್ದು ಆಕರ್ಷಣೆಯ ಕೇಂದ್ರಬಿಂದುವಾಗಿದೆ . ಬೀದಿಯ ಇಕ್ಕೆಲಗಳಲ್ಲಿ ಬೆಳೆದು ನಿಂತಿರುವ ಮರಗಳಲ್ಲಿ ಕೆಲವು ಕದಂಬ ವೃಕ್ಷ ಗಳೂ ಇದ್ದು, ಅವುಗಳ ಎಲೆ, ಹೂವು, ಕಾಯಿ, ಹಣ್ಣು ಬೀದಿಯಲ್ಲಿ ಬಿದ್ದು, ಓಡಾಡುವವರ ಕಾಲಡಿ ಸಿಕ್ಕಿ , ಅಪ್ಪಚ್ಚಿಯಾಗಿ ನಮ್ಮ ಪಾದರಕ್ಷೆಗಳಿಗೂ ಅಂಟಿ, ಮನೆಯ ಕಾಂಪೌಂಡು ಗಲೀಜಾಗಿ ಅದನ್ನೆಲ್ಲ ತೊಳೆಯುವುದೇ ರೇಜಿಗೆ ಕೆಲಸ . ಇತ್ತೀಚಿಗೆ ಮನೆ ಕಟ್ಟಿ, ಬಣ್ಣ ಬಳಿಸಿದ್ದ ನಮಗೆ ಚಿತ್ರ ವಿಚಿತ್ರ ಚಿತ್ತಾರ ಕಂಡಾಗ ಹೇಗಾಗಿರಬೇಡ?   ರಾತ್ರಿಯ ಹೊತ್ತು ಬಾವಲಿಗಳು ಕದಂಬ ಮರದ ಹಣ್ಣುಗಳನ್ನು ಹೊತ್ತೊಯ್ಯುವಾಗಲೋ ಏನೋ ಗೋಡೆಗಳಿಗೆಲ್ಲ ಅಪ್ಪಳಿಸಿ ಬಿಡಿಸಿದ್ದ ಚಿತ್ತಾರಗಳವು .

      ಹೀಗಿರುವಾಗೊಂದು ದಿನ ಬೀದಿ ಕಸ ಗುಡಿಸಲು ಬರುವ 'ರಾಜಿ' ಯೊಂದಿಗೆ ನನ್ನ ವಾದ ಶುರುವಾಯ್ತು . "ನೀನು ಪ್ರತಿ ದಿನ ಕಸ  ತೊಗೊಂಡು ಹೋದರೆ ನಮಗೆ ಈ ಕಷ್ಟ ಇರೋದೇ ಇಲ್ಲ " ಅಂತ ನಾನು. ಅವಳು "ಇಲ್ಲ ಅಕ್ಕಾ ನಾನೂ ಎಷ್ಟು ಅಂತ ಕಸ ತೆಗೆದು ಹಾಕಲಿ ? ನೀವು ಆ ವಾರ್ಡ್ ಆಫೀಸಿಗೆ ಹೋಗಿ ಹೇಳಿ ಮರ ಕಡಿಸಿ " ಅಂದಳು . ಅಷ್ಟರಲ್ಲಿ ಅಕ್ಕ ಪಕ್ಕದ ಮನೆಯವರೂ ಹೊರಗೆ ಬಂದು ತಲಾ ಒಂದೊಂದು ಡೈಲಾಗ್ ಹೊಡೆದು ಹೋದರು -  "ನೀನು ತಿಂಗಳ ಮೊದಲನೆಯ ದಿನ ದುಡ್ಡು ತೊಗೊಂಡು ಹೋಗೋಕಷ್ಟೇ ಬರ್ತೀಯ ",  "ಪಾಲಿಕೆಯವರು ಸಂಬಳ ಕೊಡಲ್ವ? ಅದರ ಜೊತೆ ನಮ್ಮಿಂದಲೂ ತೊಗೊತೀಯ?", "ಬೆಳಿಗ್ಗೆ ಅದ್ಯಾರದೊ ಮನೆಯಲ್ಲಿ ಕೆಲಸಕ್ಕೆ ಹೋಗ್ತೇಯ. ಅದಕ್ಕೆ, ಇಲ್ಲಿ ಕಸ ತೆಗೆಯೋಕೆ ಬರಲ್ಲ" ಇತ್ಯಾದಿ, ಇತ್ಯಾದಿ . ಅಷ್ಟರಲ್ಲಿ ಇನ್ನೊಂದು ಮನೆಯ ಅಜ್ಜಿ ಹೊರಗೆ ಬಂದು, "ನಿನಗೆ ತಿಂಗಳಿಗೆ ದುಡ್ಡು ಕೊಡೋದೂ ಅಲ್ಲದೆ, ನಿನಗೆ ಊಟ, ತಿಂಡಿ ಬೇರೆ ಕೊಡೋದು ನಾವು .  ನೀನು ನೋಡಿದರೆ ಗುಡಿಸು ಅಂದ್ರೆ ಪೊರಕೆನೂ ನೀವೇ ಕೊಡಿ ಅಂತೀಯ "  ಅನ್ನೋದಾ?

       ಅಲ್ಲಿಂದ ಇಬ್ಬರ ನಡುವಿನಮಾತಿನ ಚಕಮಕಿಗೆ ಸಾಕ್ಷಿಯಾಗಿದ್ದು    ಧನುರ್ಮಾಸದ ಕೊರೆಯುವ ಚಳಿ, ನಾನು ಹಾಗು ನನ್ನ ಕೈಲಿದ್ದ ನಮ್ಮ ಮನೆಯ ಕಸದ ಬುಟ್ಟಿ ಅಷ್ಟೇ . ಕಡೆಗೆ ಅಜ್ಜಿ ವಟಗುಡುತ್ತಾ ಹೊರಟು ಹೋದರು.  ರಾಜಿ ಜಗಳವಾಡಿ ಸಾಕಾಗಿ "ಅಕ್ಕಾ ಗಂಟಲು ಒಣಗಿದೆ . ನೀರು ಕೊಡಿ" ಅಂದಳು . ನೀರಿನ ಜೊತೆ ಒಂದು ಲೋಟ ಕಾಫಿನೂ ಕೊಟ್ಟೆ . ಪುನಃ ಶುರುವಾಯ್ತು ಇವಳ ಪ್ರವರ . "ಅಲ್ಲಾ, ನೀವೇ ಹೇಳಿ . ನೀವು ಎಷ್ಟು ದಿನ ನಂಗೆ ' ಕಾಫಿ ಕುಡೀತೀಯ?'  ಅಂತ ಕೇಳಿಲ್ಲ ? ನಾನೇ ಎಷ್ಟೋ ಸಲ ಬೇಡ ಅಂದಿದ್ದೀನಿ .  ಈ ಮುದುಕಿ ನನ್ನ ಕಸ ತುಂಬುವ ತಳ್ಳುಗಾಡಿಗೆ ಹಾಕೋಕೆ ಅಂತ ಇಟ್ಟಿರೋ ಹಳಸಲು ಅನ್ನವನ್ನು ಕೊಡುತ್ತೆ ನಂಗೆ ತಿನ್ನೋಕೆ. ನಾವು ಇವರ ಕಣ್ಣಿಗೆ ಮನುಷ್ಯರಂಗೆ ಕಾಣ್ಸಲ್ವ?  ನನ್ನ ಹಣೇಬರಾ. ಗಂಡ ನೆಟ್ಟಗಿದ್ರೆ ನಾನ್ಯಾಕೆ ಈ ಕೆಲಸಕ್ಕೆ ಬರಬೇಕಿತ್ತು? ಇರೋ ೨ ಮಕ್ಕಳಾದರೂ ಮುಂದಕ್ಕೆ ಚೆನ್ನಾಗಿರಲಿ ಅಂತ ಓದಿಸ್ತಿದೀನಿ. ತಿಂಗಳಿಗೆ ಸರಿಯಾಗಿ ಆ ಕಂಟ್ರಾಕ್ಟರು ದುಡ್ಡು ಕೊಡಲ್ಲ . ನಮ್ಮ ಹೊಟ್ಟೆ ಪಾಡು ನಡೀಬೇಕಲ್ಲ . ಅದಕ್ಕೆ ಪಕ್ಕದ ಬೀದಿಯಲ್ಲಿ ಒಂದು ಮನೇಲಿ ಕಸ-ಮುಸುರೆ ಕೆಲಸ ಮಾಡ್ತೀನಿ . ಈ ಮುದುಕಿ ನೋಡಿದ್ರೆ ಎನೋ ನಂಗೆ ದಿನಾ ಬಿಸಿ ಬಿಸಿಯಾಗಿ  ಊಟ-ತಿಂಡಿ ಕೊಡೋ ಥರ ಹೇಳುತ್ತೆ " ಅಂತ ಮೂಗೊರೆಸಿಕೊಂಡಳು. ನಾನೂ ಸುಮ್ಮನಿರದೆ "ಮತ್ಯಾಕೆ ಅವರು ಕೊಡೋದನ್ನ ತೊಗೊತೀಯ? ಅಷ್ಟೊಂದು ಸ್ವಾಭಿಮಾನ ಇರೋವ್ಳು ಬೇಡ ಅಂತ ಹೇಳಬೇಕಿತ್ತು " ಅಂದುಬಿಟ್ಟೆ . ಅದನ್ನು ಕೇಳಿ ಅವಳ ಧ್ವನಿ ತಾರಕಕ್ಕೇರಿತು . "ಯಾರಿಗೆ ಬೇಕು ಅವರ ಮನೆ ಅನ್ನ? ನಾಯಿನೂ ಮೂಸಲ್ಲ . ನಾನೇನು ಅವರು ಕೊಟ್ಟಿದ್ದನ್ನ ತಿಂತಿದ್ದೆ ಅಂದ್ಕೊಂಡಿದೀರಾ ? ಕಸದ ಗಾಡಿಗೆ ಹಾಕ್ತಿದ್ದೆ. ಅವರ ಎದುರಿಗೆ ಹಾಕಿದ್ರೆ ಬೇಜಾರಾಗುತ್ತೆ ಅಂತ ಎದುರಿಗೆ ಹಾಕ್ತಿರಲಿಲ್ಲ ಅಷ್ಟೇ " ಅಂದಳು . ನನಗೋ ಮುಜುಗರ . ಯಾಕಾದರೂ ಇವಳ ಜೊತೆ ಬೆಳಿಗ್ಗೆನೇ ಮಾತಿಗೆ ನಿಂತೆ ಅಂತ . ಅಂತೂ ಅವಳನ್ನ ಸಾಗ ಹಾಕಿ ಒಳಗೆ ಬಂದೆ. ನನ್ನ ಪತಿ ದೇವರಿಗೆ ಗಂಗಾವತಿ ಪ್ರಾಣೇಶ್ ಹೇಳುತ್ತಿದ್ದ "ಹೆಂಗಸರೆಲ್ಲ ಬರೀ ಮಾತೇ"  ಜೋಕ್ ನೆನಪಾಗಿ "ಅದೆಷ್ಟು ಮಾತಾಡ್ತೀರಿ ನೀವು ಹೆಂಗಸರು?" ಅಂತ ರೇಗಿಸಿದ್ರು.

     ನಾನು ಆ ಘಟನೆಯನ್ನು ಮರೆತಂತಾಗಿತ್ತು. ಆದರೆ ಹಳೇ ಗಾಯ ಪದೇ ಪದೇ ಕಾಡುವಂತೆ ಇವತ್ತು ಬೆಳಿಗ್ಗೆ ಅದೇ ರಾಜಿ ಬಂದು ನೀರು ಕೇಳಿದಳು .  ನಾನು ಲೋಟದಲ್ಲಿ ನೀರು ಕೊಟ್ಟೆ . ಅವಳು "ಅಕ್ಕಾ ಒಂದು ಚೊಂಬಿನಲ್ಲಿ ಕೊಡಿ ನೀರು. ಯಾಕೋ ತುಂಬಾ ಬಾಯಾರಿಕೆ" ಅಂದಳು . ನಾನು ನೀರು ತೊಗೊಂಡು ಹೊರಗೆ ಹೋಗೋದಕ್ಕೂ , ಜಗಳ ಆಡಿದ ಅಜ್ಜಿ ಕೈಯಲ್ಲಿ ಒಂದು ಪ್ಲಾಸ್ಟಿಕ್ ಚೀಲದ ಒಂದು ತುಂಡಿನ ಮೇಲೆ ಇಡ್ಲಿ, ಚಟ್ನಿ ತಂದು ರಾಜಿಯನ್ನು  ಕರೆಯೋದಕ್ಕೂ ಸರಿ ಹೋಯ್ತು .
 ರಾಜಿ ನೀರು ಕುಡಿದು ಸರ ಸರ ಹೋದಳು . ನಾನು "ಪರವಾಗಿಲ್ಲ , ಇಬ್ಬರಿಗೂ ' ರಾಜಿ ' ಆಗಿದೆ " ಅಂದುಕೊಂಡೆ . ಅಜ್ಜಿ ಕರೆದರು ಅಂತ ಹತ್ತಿರ ಹೋದ ರಾಜಿ ಕೈ ಚಾಚಿದಳು . ನಾನು ಮನಸ್ಸಿನಲ್ಲೇ "ಆ ಅಜ್ಜಿ ಅಷ್ಟೆಲ್ಲ ಮಾತಾಡಿದ್ರೂ, ಅವರು ಕರೆದ ಕೂಡಲೇ ಓಡಿ ಹೋಗ್ತಾಳಲ್ಲ ಇವಳು . ಸ್ವಲ್ಪವೂ ಸ್ವಾಭಿಮಾನ ಇಲ್ಲ ಇವಳಿಗೆ "  ಅಂದುಕೊಳ್ಳುತ್ತಾ ಇರುವಾಗಲೇ , ಬೀದಿಯ ಮೇಲೆ ಏನೋ ಬಿದ್ದ ಸದ್ದಾಯ್ತು .  ನೋಡಿದರೆ ಆ ಅಜ್ಜಿ ಇವಳ ಕೈಗೆ ಪ್ಲಾಸ್ಟಿಕ್ ತುಂಡು ಬೀಳುವಂತೆ ಎಸೆದಂತೆ ಮಾಡಿದ್ದಾರೆ . ರಾಜಿ ಸಿಟ್ಟಿಂದ ಕೈ ಹಿಂತೆಗೆದುಕೊಂಡಿದ್ದಾಳೆ.  ಹಾಗಾಗಿ ಇಡ್ಲಿ, ಚಟ್ನಿ ಬೀದಿ ಪಾಲಾಗಿತ್ತು .
ಅಜ್ಜಿ "ಕೆಳಗೆ ಬೀಳಿಸಿ ಬಿಟ್ಯಾ? ತೆಗೆದು ಹಾಕು . ಅನ್ನ ಅನ್ನಪೂರ್ಣೆ ಗೊತ್ತಾ? ಮಕ್ಕಳು ತುಳಿದಾವು" ಅಂದರು . ಅದಕ್ಕೆ ರಾಜಿಯಾಗದ 'ರಾಜಿ' "ಬೇಕಿದ್ರೆ ನೀವೇ ತೆಗೆದು ಹಾಕಿ . ಇನ್ನು ಮೇಲೆ ಕಸದ ಬುಟ್ಟಿಯನ್ನು ಗಾಡಿ ಹತ್ರ ತಂದು ಕೊಟ್ರೆ ಮಾತ್ರ ಕಸ ತೊಗೊಂಡು ಹೋಗ್ತೀನಿ. ಇಲ್ಲದಿದ್ರೆ ಇಲ್ಲ " ಅಂತ ಖಡಾಖಂಡಿತವಾಗಿ ಹೇಳಿ ಗಾಡಿ ತಳ್ಳಿಕೊಂಡು ಹೋಗೇ ಬಿಟ್ಟಳು .  ಅಜ್ಜಿ ಬೆರಗಾಗಿ ನೋಡುತ್ತಲೇ ನಿಂತಿದ್ದರು .


   -   ತಾರಾ ಶೈಲೇಂದ್ರ